General Santos City—Angol ang usa ka 22 anyos nga lalaki human kining gipusil sa wala pa mailhing suspek alas 5:30 ang takna sa hapon kagahapong adlawa samay Purok Balayo, Barangay Olympog, Gensan.
Giila ang biktima nga si Paulano Tapal, residenti sa Purok 5, Upper Labay, Gensan. Sa inisyal nga imbistigasyon sa Police Station 4 nasuta nga nagmaneho ang biktima sa iyang motorsiklo didto sa maong lugar dihang kalit lang kining gisundan sa mga suspek nga nakasakay sa duha ka motorsiklo.
Ginapahunong matud pa ang biktima apan tungod sa tumang kahadlok wala gyud siya mihunong mao nga siya gigukod ug gipusil sa mga suspek.
Naka-angkon ang biktima ug samad sa iyang abaga ug bukton. Bisan samdan na ang nasangpit, mipaturatoy gihapon kini sa pagpadagan sa iyang motorsiklo kung asa nakapangayo kini dayon ug tabang ngadto samga residenti sa lugar.
Gilayon man nga gidala sa ospital ang biktima ug kasamtangan nalang karon nga nagpaalim sa iyang mga samad nga naangkon. Sa karon ginasuta pa sa kapulisan ang motibo sa krimen.
