General Santos City—gidunggab sa duha ka mga suspetsadong nakamotorsiklo ang usa ka 22 anyos nga lalaki samtang kini natulog daplin sa silway Bridge, Purok Kulasi, Barangay Labangal Gensan.
Ang biktima nailhang si Mohaimen Fata, 22, resisdenti sa Purok Kulasi, Barangay Labangal Gensan.
Ala 1:30 ang takna kaganinang kaadlawon samtang natulog ang biktima daplin sa tulay, kalit miabot ang duha ka mga suspek nga nakamotorsiklo dayon gidunggab ang nahisgutan makadaghang higayon igo sa iyang likod, dughan ug sa iyang bukton nga bahin.
Paspas nga misibat ang mga suspek sakay gihapon sa ilang motorsiklo samtang ang biktima nakapangayo pa ug tabang sa usa ka tricycle driver kansa maoy nagdala kaniya sa ospital.
Sumala sa biktima nga kalaban sa iyang grupo ang midunggab kaniya. Ginganlan niini ang usa sa duha ka suspek nga si KAMBAL, miyembro sa Children in Conflict With the Law (CICL) o mas nailhan sa tawag nga āSUKARAPā.
Ang grupo ni kambal una na nilang nakalaban niadtong adlawng Sabado, August 26, 2017 kung asa natigayon ang usa ka rambol tali sa ilang grupo ug sa grupo sa suspetsado. Samdan usab siya niadtong higayuna human nabunalan kini ug bato atol sa rambol.
Dugang pa niini nga gidumtan gyud sa grupo ni kambal ang ilang grupo mao nga pagkakita sa mga nahisgutan kaniya nga natulog daplin sa tulay siya gidunggab sa mga nahisgutan.
Human sa insidenti gibutyag sa biktima nga andam niyang itudlo ang duha ka mga suspek sa kapulisan aron nga sila mapasakaan ug kaso ug mabalhog sa bilanguan.
