South Cotabato— Nagpabilin sa silda sa T’boli PNP ang suspetsado sa pagpanglugos sa usa ka 7 anyos nga bata, sa Purok Lugan, Barangay Poblacion, T’boli, South Cotabato niadtong nakalabayng adlaw.
Giila ang suspek nga si Baldwin Balunto, 22 anyos, residenti sa Purok Lugan, Barangay Poblacion T’boli. Samtang ang biktima itago lang sa pangalang alias Aiza, residenti gihapon sa maong lugar.
Sumala ni Police Sr. Inspector Rommel Villagracia, hepe sa T’boli PNP nga niadtong nakalabayng adlaw, igo rang gisugo sa iyang ginikanan ang biktima nga mupalit ug ice sa tindahan, apan kalit matud pa kining gibunlot sa suspek dayon gidala sa usa ka lugar dayon didto na gilugos.
Dugang pagbutyag ni Police Sr. Inspector Villagracia nga naabtan pa sa mga ginikanan sa bata ang ilang anak nga anaa sa usa ka lawak sa usa ka balay sa maong lugar uban ang suspek.
Nisumbong dayon kini sa iyang mga ginikanan human sa gihimo kaniya sa suspetsado. Gilayon man usab nga misumbong sa kapulisan ang pamilya sa biktima ug gipadakop ang suspek.
Base sa inisyal nga impormasyon nga nahipos sa T’boli PNP, aduna matud pay deperensya sa panghuna-huna ang suspetsadong responsabli sa krimen.
