Davao City – Gipailawom na sa swab test kagahapong adlawa ang 22 ka mga personahe sa Toril Police Station kinsa posibleng exposed sa 30 ka mga nagpositibo sa COVID-19 nga mga detainees.
Sa interbyu sa DXDC RMN Davao kang Police Major Michael Uyanguren, Toril Police Station Chief, 14 ka mga pulis lakip na siya ug 8 ka mga auxiliary ang gipang-test ug naka-isolate sulod sa istasyon.
Gituohang usa sa mga dinakpan ang carrier sa COVID-19 matud ni Uyanguren.
“Ang protocol kung naay mag-positive ibutang gyod sa isolation facility sa DOH. Hangtod wala pay result ug depende sad sa District Health Office (kung kanus-a ma-lift ang lockdown),” sumala ni Uyanguren.
Dugang niini, laing 15 usab sa mga detainees ang gi-swab test.
Gibutyag ni Uyanguren nga magpadayon ang serbisyo sa kapolisan sa Toril ug gihimong temporaryong opisina ang tapad nga gambalay alang sa pagdawat sa mga walk-in nga mga complaints.
RadyoMaN Aimee Guinita
