Nagalab-ot sa masobra P671 million ang narelease na sang Department of Social Welfare and Development Office 12 bilang financial assistance sa mga senior citizens sa bug-os nga rehiyon dose.
Suno kay DSWD 12 Regional Director Cezario Joel Espejo ang nasambit nga kantidad ang nakabenepisyo sa 223, 679 ka mga indigent elders nga nagasakop sang ila anum ka bulan nga cash aid subong nga tuig nga ginpaagi naman sa mga local government units ang distribution.
Ginpahayag ni RD Espejo nga paagi sa bulig sang mga local government units napadasig ang distribusyon sang pension sang mga senior citizens sa tunga sang ginapangatubang nga pandemya.
Samtang sa mga unpaid pension sang nagligad nga tuig nagalab-ot sa P392,913,000 ang narelease sang ahensya sa 130, 791 ka mga senior citizens, nga manubo kumparar subong nga tuig ang mga beneficiaries tungod sa ginpatuman nga nationwide cleansing sang DSWD sa listahan.
May-angot sini, nag-apela naman sang pag-intiendi si DSWD assistant regional director Bonifacio Selma Jr., sa mga benepisyaryo nga wala pa nakabaton sang monthly assistance nga tungod sa pandemya naapektuhan ang ila nga hulag, apang nagacoordinate suno pa ang pamunuan sa mga concern senior citizen presidents kag LGUs para sa schedule sang release.
Nahibaluan nga base sa Republic Act (RA) No. 9994 ukon ang Expanded Senior Citizens Act of 2010 ang mga indigent senior citizens ang makabaton sang monthly stipend nga P500 halin sa gobyerno.
