22anyos nga soltero ginlabo sa leog matapos ginluthang ang kaingod

Pareho landing sa ospital ang duha ka soltero makaligad nga makaangkon sang pilas tuga sang pagpanglabo kag pgpangluthang pasado alas 8:13 sang nagligad nga gab-I sa Sitio Salpao, Barangay Polonuling, Tupi, South Cotabato.
Ginkilala ang mga pilason nga sanday Marvin Tabacon Biansat, 26anyos, soltero kag Mario Amuguis Rafael, 22anyos, soltero, pareho residente sang nasambit nga lugar.
Sa imbestigasyon sang Tupi PNP, bag-o pa natabo ang insidente, nakabati suno pa sang lupok ang biktima nga si Marvin samtang nagapanyapon sa kaingod balay sa nasambit nga lugar, apang sang ini suno pa ang nagpanaog para usisaon ang iya sini kasapatan, nasanagan nya ang suspek nga si Mario sang dala sini nga flashlight kag nagpakilala sang iya sini sarili.
Apang sa wala suno pa nahibaluan nga rason, hinali na lang ini ginluthang sang suspek sang wala natumod nga armas luthang sa diin nakaangkon ini sang pilas sa tuo nga dughan, pero sa pihak nga pilason, natigayun pa sang biktima nga malabo sang dala nga lagaraw sa leog ang suspek.
Pareho naman nga gindala sa ospital sa Syudad sang Koronadal ang duha para gilayon suno pa nga madapatan sang medikasyon.
Samtang narekober sa gintabuan sang krimen ang isa ka basiyo sang armas luthang kag lagaraw.
Ginpaidalom naman sa ballistic examination sa South Cotabato Crime Laboratory sa Syudad sang Koronadal ang narekober nga basiyo sang armas luthang.
Kaangot sini ginpahayag ni Police Chief Ins Bernie Faldas, Hepe sang Tupi MPS, mahulog na lang sa regular filing sa korte ang pagpasako sang kaso sa suspek matapos nga indi pa makahatag sang affidavit ang biktima bangud ginpaidalom ini sa operasyon bangud sa naangkon nga pilas tuga sang pagpangluthang.
Naguwa pa sa ila nga imbestigasyon nga kilalahay pa ang suspek kag biktima bangud isa lang sila ka lugar, apang gintiro pa ini sang suspek nga yara sa impluwensya sang makahulubog ng ilimnon.
Dugang pa ni Faldas posibli frustrated homicide ang ipasaka nga kaso sang biktima batok sa suspek, apang nagadepende naman sa suspek kun magpasaka man ini sang kaso matapos malabuan ini sa leog.
Samtang indi naman makasuhan sang illegal possession of firearms ang suspek bangud wala na ang armas sang mag abot suno pa ang kapulisan.