23 ANYOS NA NANAY NA NAMATAY SA PAGPANGANAK UG BABY BOY TAGTAKDA ILUBONG NA SILOM ADLAWA SA PUBLIC CEMETERY SA SURIGAO CITY
Tagtakda na ilubong na silom alas 9:00 sa buntag sa Public Cemetery nan Surigao City, an 23 anyos na inahan na si Emeluni Taasan lakip an bag-ong tagpanganak na baby boy na namatay suyod sa Caraga Regional Hospital adton Oktubre 29, 2017.
Namahayag an live-in partner niini na si James Cresante, gumikan sa pipila ka kakulian ugsa na tag-iswag nila an schedule sa paglubong, gikan sa orihinal na plano na kuman adlawa unta ipahimutang sa katapusang kapahulayan si Taasan ug an ila anak, silom na lamang buntag. Nanhingusog an nabiling pamilya na unta maangkon an hustisya sa pagkamatay nan ija mag-ina labi na an tinguha na masang-atan nan kasong Medical Malpractice an responsable na personahe na nag-duty sa amo na hospital.
Kon kahinumduman, sa Medical Certificate ni Taasan nalatid didto an bleeding an rason sa pagkamatay niini lakip na an bata resulta sa “Anencephaly” o an kundisyon sa pagkahimugso na waya ma-develop an utok niini.
Naunang nagpatabang na sa RMN Surigao si Cresante na mapailayom sa otopsiya nan PNP SOCO o National Bureau of Investigation an pataynglawas sa ija live-in partner, ini para matino kon uno an nag-gahi na butang sa may tiyan sa napatay na si Taasan kay basin may nabilin pa na bata o kon may pagpasagad ba an mga nagpa-anak ugsa na namatay an ija mag-ina.
