Davao City – Gilauman nga sugdan karong Disyembre og ayo ang 23 ka mga traffic lights nga depektado o wa na gyod gaandar.
Giesplekar ni City Traffic and Transport Management Office Head Dionisio Abude nga ginapaabot nalamang nila mahuman ang bidding para ma-repair kini.
Adunay 63 ka mga traffic lights ang syudad ug 23 niini ang adunay daot sama sa grounded na ang mga wires kay nabasa sa ulan, kambyuhanan ang mga cooling fans, ilisanan na ang mga monitor unit ug uban pang mga problema.
Sa pagkakaron matud ni Abude samtang wala pa gafunction ang maong traffic lights nagdeploy og tag 3 ka mga traffic enforcers sa mga areas nga apektado.
“Naa tay mga gibutang nga mga enforcers katong intersections nga naa tay problema sa traffic lights,” sumala ni Abude.
Matud ni Abude posibleng sa 1st quarter pa sa 2019 mapuslan pa’g balik ang nasangpit nga mga traffic lights.
Gitataw ni Abude nga walay mga disgrasya nga na report kanila tungod sa mga dili functional nga mga traffic lights.
RadyoMaN Aimee Guinita
