23 KA MGA BALAY, NATUPOK SA SUNOG SA BARANGAY GENERAL HUGHES ILOILO CITY

Naglab-ot sa 23 ka mga balay ang natupok sa nagluntad nga sunog kaina sang hapon sa Barangay General Hughes, City Proper.
Nagtuhaw ang kalayo pasado alas 3 sang hapon kag na-fire out pasado naman alas 4 sang hapon.
Sa inisyal nga report, naghalin ang kalayo sa balay sang pamilya Lacson kag madasig nga naglapta sa iban nga pamalay nga lunsay nahuman sa light materials.
Padayon pa nga gina-imbestigahan sang Bureau of fire Protection kon pila ang natuga nga kahalitan sang nasambit nga sunog.
Samtang, temporaryo karon nga ginpahamtang sa Fort San Pedro National High School ang mga biktima sang sunog kag gilayon nga ginhatagan sang bulig sang CSWDO nga ginalakipan sang mga pagkaon kag mga gamit.