Ta alcansa ya na 2,400 mga caso del accidente vehicular el ya rehitra aura na oficina del Policia Local na entrada del mez de Setyembre.
Asegun con el nuevo hefe del Traffic Division del Mando Policia Local Chief Inspector Raymond Sanson, el 2,400 caso de accidente vehicular ya rehistra desdel mez de Enero hasta aura que ta continua syempre subi. El estado de mas alto pa contra con semejante meses desdel año pasao base na records del policia local.
Totalmente el onse estaccion del policia ya fuede nota que mucho del mga accidente vehicular ta ocuri na mga camino imbuelto mga ta usa motorciclo, contra na mga privado y de publico vehiculo.
Si Sanson ya abla cay sila mismo ta apela con mga motorist para impone diciplina na usada del camino, dale respeto con otro mga motorista, y sigui con el mga reglamento na trapico para Evita mga desgracia.
Si Sanson ya abla cay ya alcansa tambien na 1,918 el mga caso de physical injuries que ya resulta na 4,378 accidente vehicular na camino nacional na entero rehiyon nueve.
Base na records del policia, 1,106 lang el caso de accidente vehicular na provincial de Zamboanga del Norte, 521 na Zamboanga del Sur, 306 na Zamboanga Sibugay y 45 caso de accidente vehicular na ciudad de Isabela. – *Bhong Simbajon/RMN News*
