General Santos City—Patay ang 25 anyos nga lalaki nga nailang si Elton John Gallego Pesito, single, residenti sa Purok Upper Matibay, Barangay San Isidro, human kining gipusil sa wala pa mailhing suspek alas 7:25 ang takna sa gabie, Lunes, enero 6, 2020.
Subay sa pahayag sa amahan sa biktima nga si Eliseo Pesito, nag-andam ug panihapon ang iyang anak dihang kalit lang may nisulod nga lalaki sa ilang balay dayon gipusil ang biktima duha ka higayon sa ulo niini nga hinungdan sa iyang kamatayon.
Paspas nisibat ang suspek human sa pagpamusil. Narekober gikan sa crime scene ang 2 ka empty shell ug usa ka slug sa cal. 45 nga armas.
Sa karon ginasuta pa sa kapulisan ang motibo apil na ang suspek sa maong kremin.
Kini na ang ikaduhang higayon sa pagpamusil patay dinhi sa Gensan karong bulan sa Enero.
