Pagadian City – Patay ang usa ka 25-anyos nga lalaki sa pagpamusil kagahapon sa 03:35 ang takna sa kadlawon sa Purok Bakhaw C, Kawit District, Pagadian City, Zamboanga del Sur.
Ang biktima mao si Wilmer Heneral Labrada, 25 anyos, Filipino, adunay ka live-in, dishwasher sa Marilyn eatery, ug residente sa Purok Bakhaw C, Kawit District, ning syudad.
Ang suspetsado mao si Mark James Dela Torre Hedocil, alias “Jepoy” 34anyos, adunay ka live-in, usa ka online seller, ug residente sa Muslim Village, Kawit District, ning syudad.
Sa imbestigasyon sa kapulisan sa Pagadian gibutyag nga ang grupo sa biktima adunay panaglalis sa grupo sa suspetsado ug parehong lango sa ilimnong makahubog.
Ang ig-agaw sa biktima nga usa ka 19 anyos nakasaksi sa maong panghitabo. Ang suspetsado matud pa miabre sa U-box compartment sa iyang motor Mio ug mikuha sa pusil ug gibutang kini sa iyang hawak ug mipaingon dayun sa biktima. Ug sa walay estorya, mibunot sa pusil sa iyang hawak ug mipusil sa biktima nga miigo sa iyang tingkoy.
Sa dihang nahagba na ang biktima, laing duha ka bala pa ang gipabuto sa suspetsado ngadto sa biktima nga naigo sa too nga bahin sa iyang ulo nga miresulta sa iyang hinanali nga kamatayon.
Nakuha sa dapit nahitabuan ang tulo ka basiyo sa bala sa Calibre 45 nga pistola. Human sa maong incidente, ang suspetsado daling misibat paingon ngadto sa Brgy San Pedro, Pagadian City.
Personal nga panagbangi ang motibo sa maong insidente. Sa pagkakaron, padayun pa ang gihimong follow-up ug hot pursuit operation batok sa miikyas nga suspetsado samtang gi andam na ang kasong pagpatay batok sa suspetsado.
