25 nga balay ha Samar, naglarab han sunog dungan han pagtigaman han pyesta han mga minatay

TACLOBAN CITY – Nasunog an 25 nga balay ha Catbalogan City, Samar dungan han pagtigaman han pyesta han mga minatay dida han Nobyembre 2.

Kumalat ngan naglarab an sunog ha Purok 6 han Barangay Canlapwas ala 1:21 han kulop ngan gintutuuhan nga nagtikang an kalayo ha panimalay ni Roel Mahilum.

Sumala kan SFO3. Adriano De La Peña, imbistigador han Catbalogan Fire Station, nagdudumara pa hira hin imbistigasyon kun ano an gintikangan han sunog.


Gindeklara an fire out alas 2:15 han kulop.

Pero basi han inisyal nga imbistiigasyon, faulty electrical wirings an nakikit-an nira nga posibilidad han sunog tikang ha panimalay ni Mahilum.

Dugang ha pamahayag ni Dela Peña, waray patawo-tawo ha nasabi nga area kay an mga tawo in nakadto ha sementeryo hadto nga mga oras.

Bumulig gihapon an Chinese Volunteer Fire Brigade para mamatay an kalayo.

Diri pa makakasiring an Catbalogan City Fire Station kun pira an danyos han sunog nga naapektuhan an 150 katawo.

Dida han nakalabay nga Mayo 8, lumarab gihapon an sunog ha syudad ngan 300 nga kabalayan an nadestroso.

(Photo by Richard Radomes)

Facebook Comments