General Santos City—Patay ang 26 anyos nga lalaki nga nailang si Rolly Bongcac, residenti sa Purok Puting Bato, Barangay Calumpang, Gensan human kining gidunggab sa iyang kaugalingong magulang nga si Veronico Bongcac, 36 anyos, alas 7:00 ang takna sa gabie didto mismo sa ilang lugar.
Subay sa pahayag sa igsuon sa biktima ug sa suspek nga si Robert, nag inum sila didto sa ilang lugar, apan dihang nahubog, nagbingkil ang duha niini ka manghod. Ilang giuwang ang mga nasangpit apan dihang niuli na si Robert, didto na gidunggab sa suspek ang iyang manghod igo sa walang bahin sa iyang tyan.
Nadala pa sa usa ka pribadong ospital sa Gensan ang biktima apan alas 8:00 pasado ang takna sa gabie, nakabsan kini sa iyang kinabuhi. Samtang ang suspek misibat human niya giluba ang iyang manghod.
Nasayran nga ayha nahitabo ang pagpanunggab, nanghagad ang biktima sa iyang mga igsuon nga mag-inum gumikan kay mulawod na kini ug binulan na usab makauli sa ilang balay apan wala sila magdahum nga mahagbong sa trahedya ang tanan human nga giluba sa iyang igsuon ang biktima.
