Davao City – Gipaigmat sa City Disaster Risk Reduction and Management Office ang 26 ka mga coastal barangays sa mga posibleng peligrong dala sa Habagat o Southwest monsoon.
Sa interbyu sa DXDC RMN Davao kang Alfredo Baluran, CDRRMO chief nakaalerto na ang tanang Barangay Disaster Risk Reduction Management Office (BDRRMO) ug hugot kining nagmonitor sa sitwasyon sa kadagatan.
Gipahimangnuan ni Baluran, ang liboan ka mga residenting sakop sa 26 Coastal Barangays nga mangandam ug dili na maghulat nga pugson pang mubakwit kung aduna nay abisong mu-evacuate gikan sa mga awtoridad.
“Dugay na nato silang gipangsultian ang mga coastal barangays especially karon nga monsoon season naman, dagko ang mga balod, taas ang taob sa dagat, naa gyuy maapektuhan nga mga balay diha kanang mga shanties diha ang uban gipatarok ra sa ibabaw sa balas,” sumala niini.
Gimanduan ni Baluran ang tanang mga barangays nga gawas sa existing evacuation centers magprepara og alternatibo pang lugar nga kabutngan sa mga evacuees aron masigurong dili magdasok ug maobserba ang social distancing tungod sa hulga sa COVID-19.
RadyoMaN Aimee Guinita
