SYUDAD sang Iloilo – May bag-o nga 26 ka barangays sa syudad nga gindeklarar nga drug-cleared.
Dugang ini sa una na nga tatlo nga una na nadeklarar nga drug-cleared sadtong 2017 nga amo ang barangays Sta. Isabel kag Luna sa Jaro kag Sampaguita sa City Proper.
Ini matapos ang maid-id nga deliberasyon sang regional oversight committee sa pagpanguna sang Philippine Drug Enforcement Agency (PDEA), Department of Interior and Local Government (DILG) kag Philippine National Police (PNP).
Matapos ang deliberasyon, ginvalidate ang aplikasyon sang 69 ka barangays kag ginkumparar sang PNP kag PDEA ang ila records.
Bangud sini nakadesisyon sila nga ideklarar nga drug cleared ang 26 ka barangays.
Sa data gikan sa PDEA ang mga barangays nga drug cleared na sa syudad sang Iloilo amo ang -Barangay San Jose sa Arevalo; -Barangays Aguinaldo kag Lopez Jaena Sur sa distrito sang LaPaz; -Barangays Arsenal-Aduana, Inday, Nonoy, Rima-Rizal, Sto. Rosario Duran, Tanza Timawa 1 kag 2 sa City Proper; duha sa Lapuz nga amo ang Barangay Loboc kag Punong; isa sa Jaro nga amo ang Barangay Javellana.
Sa Mandurriao, ginalakipan ini sang Barangay Calajunan; Guzman-Jesena; Pali-Benedicto; San Rafael; PHHC Block 17 kag 22; kag Dungon C.
Sa Molo, Barangay Avanceña; Poblacion; South Fundidor; Barangay San Antonio kag Taal.
Bangud sini nagdangat na sa 29 ka barangays sang syudad ang drug-cleared.
Nahibaluan nga target sang PDEA nga malambot ang indi magnubo sa 90% sa 180 ka barangays ang madeklarar nga drug-cleared.//via JPF
Photo from web
