26 ka mga bag-o nga salakyan ginpanagtag sa 26 ka mga Barangay sa Victorias

15

VICTORIAS CITY- Ginpanagtag ni Mayor Francis Frederick Palanca sa mga barangay officials sang 26 tanan ka mga kabarangayan ang 26 man ka mga salakyan nga Hyundai H100 nga nagabalor kada isa sang tag P1,250,000 kada isa.

Suno sa alkalde nga ang salakyan mahimo ini nga magamit bilang multi-purpose vehicle sang tagsa ka mga barangay kag ini natigayon paagi sa pag-aprubar sang Sangguniang Panglungsod sang Victorias nga maka-loan sang kapin P96 milyones pesos.

Ginalantaw ni Mayor Palanca nga dako ini ang mabulig bangud sa tion sang mga emerhensya inde na kinahanglang nga maghulat pa sang ambulance para madala sa bululngan ang mga nagamasakit.

Ginbaton naman ni ABC President Juvy Pepello ang symbolic key kag nagpasalamat ini sang dako tungod dako ang mabulig sang mga salakyan sa tagsa ka barangay labi na ang mga malayo sa city proper.

Antis sining mga salakyan may 2 naman ka bag-o nga mga ambulance ang ginbakal sang syudad sa diin ang isa ginhatag sa Rescue Unit sang Victorias City samtang ang isa sa City Health Office.

Magluwas sini may ginapaabot pa gid nga ambulance ang Victorias kag ini magagikan sa Nanjo City, Okinawa Japan bilang donasyon.

Sa nahibaluan nga ang Nanjo City ginakabig nga sister city sang Victorias.

Sa pihak nga bahin ginapabugal naman ni Mayor Palanca nga sa amat-amat nakapamakal ang syudad sang heavy equipment kaangay sang dump truck, grader, backhoe kag pison sa diin ang budget ang gikan sa savings sa sang DRRM. /Grace Supe

Facebook Comments