General Santos City–Mag atubang ug patong-patong nga kaso ang usa ka Cirquin Llagas, 27 anyos delivery boy ug nanimuyo sa Salvacion Cawa, Barangay Dadiangas West Gensan human nga masikop kini sa kapulisan gumikan sa pag pangulata sa iyang inahan ug paghupot ug replika sa cal. 45 nga pistola, samtang na recover usab sa panimalay niini ang usa ka granada ug usa ka 38 revolver.
Sumala pa ni PSI Abdusakam Mamalinta ang hepe sa Police Station 1 nga posebleng mag atubang ug kasong slight physical injury ang nasangpit tungod sa pagpangulata sa iyahang inahan, pag supak sa RA 10591 kon Comprehensive Law On Fire Arms And Ammunition ug RA 9516 kon illegal possession of explosives in relation sa nag padayong Comelec Gun Ban.
Dugang pa ni PSI Mamalinta nga alas 6:00 ang takna sa gabie nagpatabang matud pa sa ilang estasyon ang inahan sa suspect nga si Cristina Llagas, 47 anyos ug nanimuyo sa susamang lugar human nga gipasakitan matud pa kini sa iyang anak hinungdan nga gioperasyonan sa kapulisan kung diin naabtan sa mga pulis nga nag gunit kini ug replica sa kalibre 45 nga armas.
Samtang sa gihimong follow up operation sa panimalay sa suspect didto na nakuha ang granada ug ang 38 revolver sa suspect nga nakatago matud pa sa iyahang cabinet.
Dili matud pa kini ang unang higayon nga gipasakitan sa nasangpit nga suspect ang iyang inahan. (Dave Silagan)
