Naglab-ot sa 27 ang kaso sang firecracker-related injuries nga narekord dire sa probinsya sang South Cotabato base sa consolidated report sang Provincial Epidemiology and Surveillance Unit (PESU) sang Integrated Provincial Health Office halin December 1, 2019 tubtob January 6 subong nga tuig.
Ang nasambit nga kaso suno kay Provincial Health Officer Dr. Rogelio Aturdido Jr. ang pareho lang sang nagligad nga tuig matapos nga pormal na nga nagtakop ang ila nga monitoring kag reporting sang Enero 5.
Nagaedad naman sa apat tubtob 46-anyos ang mga nabiktima sang palupok kag kadam-an ang yara sa age group nga 0-10 years old nga may 13 ukon (48.1%), 11-20 anyos may 6, 21-30 years old 6 ang nabiktima kag 41 tubtob 50 anyos may2.
Sa 27 ka mga nabiktima sang palupok ang halos mga lalaki naman kag 20 ukon 74% sang kaso ang actively involved ukon direkta nga nagpalupok.
Nagapanguna naman sa may mataas nga kaso sang firecracker-related injuries ang banwa sang Norala may 7, Surallah nga may 6, Koronadal may 5, T`boli -4, Sto. Nino-2, Banga, Polomolok kag Tupi may tig-isa ka kaso.
May-angot sini ginacongratulate naman ni Dr. Aturdido ang mga banwa sang Tampakan, Tantangan kag Lake Sebu tungod wala sila sang narekord nga kaso sang nabiktima sang palupok
Samtang ang klase sang palupok nga nakabiktima amo ang illegal firecracker nga 5 star nga 4 ang biktima, plapla-2, triangle kag piccolo tig-isa ang nabiktima, sa legal naman sa pasirit kag kwitis may tig – 4 ang nangin nabiktima,baby rocket -2, multiple shots pyrotechnics -2, watusi – 1, sa iban nga klase sang firecrackers flying tiger – 2, sadawo, Boga kag improvised may tig-isa, pulbura -2.
Nakaangkon naman sang blast/burn without amputation ang 21 ka mga biktima kag ang anum ang nakaangkon sang eye injury nga lunsay naman ang mga ini outpatient.
Wala naman sang nareport nga kaso sang napatay tungod sa firecracker injury kag wala man sang nabiktima sang stray bullet sa South Cotabato.
Ginpahayag ni Dr. Aturdido nga ginakabig niya nga wala nagmadinalag-on ang kampanya kontra palupok sa South Cotabato sa selebrasyon sang paskwa kag bag-ong tuig tungod wala man nagnubo ang kaso nga amo ang ila nga target.
