Ha mga gindumara nga Police operation ha bug-os nga Rehiyon tikang Septyembre 17 yana nga tuig tubtob Setyembre 24 o kun usa ka semana, 270 nga mga wanted person an naaresto han mga kapulisan.
6 nga Police Provincial Office ngan 2 nga City Police Office an nagdumara hin intensify arrest ha mga wanted person nga may mga pending nga kaso.
Ini an pinaka syahan nga nahinabo nga ha sakob han pito kaadlaw, sugad na hito nga numero an mga nadakop han mga otoridad.
Sumala kan PNP Regional Director PCSupt. Gilberto Cruz, angay dakpon ngan diri la pabay-an ini nga mga wanted person nga magsinudoysudoy ha mga lugar ha Rehiyon.
Base ha datos han PNP Region 8, 20 tanan an mga naaresto sakob ha Top 10 Wanted Person ha City ngan Municipal level.
Ha 270 nga mga naaresto, 37 dinhi in may kaso nga pangawat o kun theft, 32 ha murder, 29 ha homicide, 18 ha rape, 13 ha robbery ngan 11 naman ha physical injury. Ngan bayolasyon naman ha special laws ngan non index crimes in aada ha 130.
Sumala han Police Regional Office, padayon ini nga police operation pag aresto ha mga wanted person, sobra pa 2000 an may standing warrant of arrest.
Diri la daw ini makakabulig ha PNP kundi makakabulig liwat ha mga naaresto nga depensahan an ira mga kalugaringon ha korte.
