Kumalarang, Zamboanga del Sur – Gipangita na karon sa otoridad ang 30-anyos nga ulitawo nga maoy gitudlo nga responsable sa pagtigbas sa iyang kaugalingon nga ig-agaw niadtong nakalabay nga adlaw didto sa Purok 2, Barangay Limamawan, Kumalarang, Zamboanga del Sur.
Giila sa Kumalarang Municipal Police Station ang biktima nga si Elmar Dablo Tumalas, 28-anyos, samtang giila usab ang suspek nga si Angelito Tumalas Tilabad parehong lumulupyo sa nasangpit nga lugar.
Sa inisyal nga imbestigasyon nasayran nga ang biktima ug suspek nag-inom atol sa birthday sa igsoon sa biktima nga si John Mark Dablo Tumalas apan ang sadya nga panagtagay nisangko sa paglalisay nga nisangko sa kagubot.
Nakahigayon ang suspek pagkuha og sundang nga maoy gigamit sa pagtigbas sa biktima.
Ang biktima daling gidala sa Zamboanga del Sur Medical Center alang sa dinali-an nga medikasyon.
Naglusad na karon og hot pursuit operation ang kapulisan alang sa pagdakop sa suspek nga naka-ikyas.
