Nakabaton sang P100k cash aid ang yara sa 29 ka mga centenarians sa rehiyon dose ukon ang mga nakalab-ot sang edad nga 100 nga ginhatag naman sang Department of Social Welfare and Development (DSWD). Ang nasambit nga mga centenarian’s ang nakabaton man sang felicitation nga pirmado mismo ni Presidente Rodrigo Duterte magluwas sa cash aid.
Suno kay DSWD-12 regional director Cezario Joel Espejo umpisa sang Enero subong nga tuig padayon ang implementasyon sang ahensya sang Republic Act No. 10868 ukon ang “Centenarians Act of 2016”.
Panawagan naman ni RD Espejo nga kon may mga himata pa nga nagaedad na sang isa ka gatos ang magcoordinate lamang suno pa sa tagsa sini ka mga local government unit sa lugar.
Dugang niya pa nga kinahanglan lamang sang malapit nga pamilya sang centenarian nga magpresentar sang bisan ano nga mga dokumento nga nagapamatuod kapareho sang birth certificate, passport, Office of the Senior Citizen Affairs ID, marriage certificate, ukon bisan ano nga ID nga nagapakita sang centenarian’s birthday.
Apang kon wala sang nasambit nga mga dokumento pwede man ang birth certificate sang bata sang centenarian agud maistablisar ang edad sini.
Nahibaluan nga base sa balaud tanan nga mga naglab-ot sa edad nga 100 nagaistar man sa pungsod ukon sa abroad ang makabaton sang cash incentive nga nagakantidad sang P100, 000 halin sa national government bilang “centenarian gift”.
Magluwas sanasambit nga benepisyo halin sa national government ang mga kwalipikado nga centenarian ang makabaton man sang pasidungog kag insentibo halin sa tagsa sini ka syudad, munisipalidad kag subong man sang provincial government.
Ang mga centenarian nga makabaton sang cash aid ang base naman sa pagdeterminar sang tagsa sini ka mga local government unit (LGU).
