Zamboanga del Sur – Gitunol na sa kagamhanang probinsyal dinhi sa Zamboanga del Sur kaniadtong Sabado sa buntag ang 2 milyones pesos nga reward ngadto sa usa ka impormante kinsa nahimong tulay sa pagluwas ug pagsakmit sa British National nga si Allan Hyrons ug sa asawa niining Pinay nga si Wilma Hyrons gikan sa mga kamot sa mga teroristang Abu Sayyaf.
Kahinumdumang gidagit ang magtiayong Hyrons sa ila mismong gipanag-iyahang resort sa Tukuran ning probinsya kaniadtong Oktubre 4 ug naluwas kini sa mga sundalo human sa engkwentrohanay tali sa grupong Abu Sayyaf ug militar kaniadtong Nobyembre 24.
Aminado si Western Mindanao Command commander Lt. Gen. Cirilito Sobejana, nga dili sayon ang pagsagop sa magtiayong Hyrons gumikan kay mikabat sa tulo ka higayon ang sinuklianay ug bala tali kanila ug sa grupong Abu Sayyaf.
Gikalipay usab sa hepe sa Westmincom nga mihinay na ang pwersa sa grupo gumikan kay napatay nila sa engkuwentro ang giingong mastermind sa kidnapping ug ang giilang subleader sa Abu Sayyaf nga si Sibih Pisih.
Gidugang usab ni Sobejana nga nailhan na nila ang mga pangalan sa mga suspetsado sa gipagawas nga composite sketch.
Tinguha usab ni Gov. Victor Yu na pakusgan pa ang intelligence monitoring para malikayan ang susamang mga panghitabo.
Samtang padayun usab ang pagpangita sa mga kasundaluhan ngadto sa ubang pang mga person of interest nga nagpaluyo sa nasangpit nga pagpangdagit.
