Davao City – Gilaumang anaa sa 11,500 ka indibidwal ang mupartisipar ugmang adlawa, June 20, 2019 sa himuong 2nd Quarter Nationwide Simultaneous Earthquake Drill (NSED) karong tuiga diin ang Digos City, Davao del Sur ang pilot area dinhi sa Davao region.
Sa pakighinabi sa DXDC RMN Davao kang Marvin Samson, Civil Defense Officer III sa Office of the Civil Defense (OCD)-XI, gipasabot niini nga napili ang Digos City tungod sa nakita sa Rapid Earthquake Damage Assessment System (REDAS) nga delikado ang maong lugar kung maigo sa kusog nga linog labi na ang 7.0 magnitude tungod sa bag-ong nadiskobre nga fault line nga gitawag og Tambulan fault diin nagsubay kini sa Padada, Davao del Sur padulong sa Sta. Maria, Davao Occidental.
“Based sa REDAS nga reading, Digos City ang dakong damage because highly urbanized area and daghan pud mga infrastructure ug population pud sa Digos City compare sa other municipalities sa Davao del Sur,” saysay ni Samson.
Sugdan ang ceremonial activity ala-1:30 sa hapon atbang sa Digos City National High School ug gilayong sugdan ang drill alas-2:00 sa hapon diin partisiparan kini sa mga lumulupyo sa lugar, mga nanag-iya og mga establishemento ug uban pa.
Human sa drill, gilayong magpahigayon og post evaluation meeting ang mga earthquake evaluators ug mga participating agencies aron ma-assess ug mahatag ang rekomendasyon sa gipahigayong pagbansay.
Nasayran nga ang NSED usa ka pagpangandam labi na panahon sa kusog linog aron magbaton og igong kahibalo ang katawhan kung unsa ang mga angayan nga buhaton.
RadyoMaN Kirby Manzon
