Sarangani Province–Napuno sa mga programa ang 2nd Quarter sa Sarangani Province, atong bulan sa Abril, Mayo og Hunyo 2018 ilalum sa Sulong Sarangani flagship program.
Laing batch sa mga scholar ang malampuson nga nakahuman sa ilang napiling kurso tungod sa ayuda sa Paaral Para sa Sarangan Scholarship Program kon PPSS. Emosyonal nga nagpasalamat ang inahan sa scholar nga taga-Glan human nipaso ang iyang anak isip Cum Laude taliwala sa panginabuhi sa iyang bana nga mao matud pa ang pagpanglibod og mga paninda.
Dako usab ang pagpasalamat sa mga benipisyaryo sa SAAD kon Special Area for Agricultural Development hilabi na ang mga kaigsoonang lumad sa kabukiran sa Malungon tungod wala na matud pa sila nagkautang-utang resulta sa maayong ani sa ilang uma gikan sa libreng gipanghatag nga semilya sa upland rice, white corn, mga hayop og kagamitan pang-agrikultura.
Sa pikas nga bahin, gitagaan og pagtugot sa Sangguniang Panlalawigan si Governor Steve Chiongbian Solon atong 2nd Quarter aron pirmahan ang memorandum of agreement tali sa Department of Health alang sa P333 Milyones ka pesos nga grant alang sa Sarangani Province. P77.2 Milyones ka pesos para pagpalambo sa Maitum Municipal Hospital, P133.3 Milyones ka pesos alang sa Sarangani Provincial Hospital, P12.9 Milyon para sa Kiamba Municipal Hospital, P7 Milyon sa Glan Municipal Hospital, P6.7 Milyon sa Malungon Municipal Hospital, P41.2 Milyon para itukod og mga barangay health center sa entiro Sarangani, og P5 Milyones ka pesos para paninduton ang Malapatan Municipal Health Office.
