Sarangani Province–Excited na karon ang mga bird enthusiast, estudyante ug mga gabuhat og environmental research dili lang sa Rehiyon Dose kundili sa uban pang parte sa Pilipinas bisan na sa ubang mga nasud tungod kay ila napung masaksihan ang dili muubos One Hundred Thousand (100,000>) kabuok mga migratory raptors nga muagi sa kalangitan sa Sarangani Province una pa mudiritso sa nasud Indonesia.
Mahitabo kini karong Oktubre 2 sa bungtud nga bahin sa Barangay Rio del Pilar lungsod sa Glan gitawag ang maong area nga “Raptor Hill” tungod kay maayo ang lokasyon niini sa pagsud-ong sa mga nanglupad. Dili sila mga ordinaryong langgam kundili mga banog nga gikan pa sa nasud Japan ug Taiwan, sama sa Chinese Sparrowhawk ug Gray-faced Buzzard.
Tungod sa katugnaw sa klima karong panahuna sa Japan ug Taiwan nga anaa makita sa babaw nga bahin sa mapa, nagapanaog kini nga mga raptor sa mga nasud nga anaa sa ilang ubos nga bahin/southern portion.
Ikaupat (4th) ka tuig na karong tuiga nga nagpahigayon og raptor monitoring ang ECPC o Environmental Conservation and Protection Center ilalum sa opisina ni Governor Steve Chiongbian Solon sa pagpanguna ni ECPC Executive Director Cornelio Ramirez Jr. katugbang ang grupo nga Raptorwatch Network Philippines gidumalahan sa Davao-based environmentalist nga si Attorney Alex Tiongco, ug ilang napamatud-an nga ang lungsod sa Glan hilabi na ang upat (4) ka barangay – ang Rio del Pilar, Laguimit, Cross ug Batulaki – ang gihimong stopover ug flyway o ruta sa mga langyaw nga banog una mudiritso sa Indonesia.
Nigawas sa ilang upat (4) ka tuig na nga pagtuon nga ang katapusang semana (last week) sa bulan sa Setyembre hangtud ikaduhang semana (2nd week) sa bulan sa Oktubre ang pinakadaghang migratory raptors nga gaagi, may higayon gani nga mutabon ang kangitngit sa kahitas-an bisan udtong tutok tungod sa ilang gidaghanon.
Ang resulta sa ikaupat nga raptor monitoring study ang i-presenta kini nila ECPC Director Ramirez didto sa Bali, Indonesia karong Oktubre 10 atol sa ipahigayon nga International Raptor Conservation Symposium. Sa maong panagtigum, ang tanang mga nasud sa tibuok kalibutan ang mu-presenta sa ilang mga nahimong pagtuon kabahin sa kalihukan sa mga raptor nga anaa sa ilang lugar.
Mahinungdanon ang mga banog sa pagbalanse sa kinaiyahan tungod kay sila ang mga natural pest control, ilang ginakaon ang mga ilaga, bakukang ug uban pang peste sa agrikultura bisan pa ang mga bitin, maong angay silang protektahan ug dili hantingon.
Gawas sa paglantaw sa mga raptor gamit ang mga dakong teleskopyo gitawag nga binoculars, daghang aktibidad ug pa-kontest usab ang giandam karong Oktubre 2, sama na lang sa kumpetisyon sa pagpalupad og tabanog o kite flying, naay poster making contest ug daghan pang environmental games. Magpadayon pud ang pagpananum sa libuan ka semilya sa fruit trees ug endemic trees sa Mount Taltak, ang gikaingon nga roosting site kon kapahuwayan ug kapangitaan pagkaon sa maong mga raptor.
Kaabag sa ECPC Sarangani ug Raptorwatch Network Philippines sa kini nga 2nd Raptor Watch Festival ang LGU Glan sa pamunuan ni Mayor Vivien Yap nga magsaulog usab sa ilang Lubi-Lubi Festival, ug ang Philippine Eagle Foundation, Protect Wildlife-USAID, ug ang mga barangay officials, sa pagsuporta nila Senador Manny ug Congressman Ruel Pacquiao ug ang Sangguniang Panlalawigan.
