General Santos—Narescue sa nagpakabanang mananagat ang tulo ka mga Indonesian fisherman, 100 nautical miles east nga bahin sa Mati City, Davao Oriental.
Ang maong mga mananagat giilang silang si Aniz Mirino, Bertus Mirino, 26 anyos ug Kasura Mirino, 25 anyos, Boat captain ug pulos residenti sa Papua Barat Province, Indonesia.
Sumala ni PO3rd Jho-an Taban, Coastguard Sub Station Commander nga nakabase sa Gensan Fish port nga kagahapon sa buntag dihang giturn-over ngadto sa ilang buhatan sa mga mananagat ang tulo ka mga biktima human silang nabangalan.
Subay sa pahayag sa mga biktima nga sila nanagat sa Polo Asia nga sakop sa teretoryo sa nasud Indonesia, apan sila nahutdan ug gasolina sa ilang Bangka hangtud nga sila gianod sa tubig dagat ngadto sa kadagatang bahin sa Mati City.
Sumala pa nga 11 ka adlaw nga nagpa-utaw utaw sa kadagatan ang mga biktima ayha sila nakaplagan. Tungod niini sila gitabangan sa mga mananagat nga maoy nakakita kanila ug gidala dinhi sa Gensan.
Gilayon man sila nga gipailawom sa medical check-up aron nga masigurong luwas ang ilang panglawas. Gilayon silang giturn-over sa konsolada sa Indonesia nga nakabase dinhi sa Gensan ug sila na maoy mutabang kanila aron sila makabalik ngadto sa nasud Indonesia.
