3 ka balay sa Malaybalay, 5 usab sa Valencia, nasunog

35

Duha ka insidente sa sunog ang nahitabo sa Bukidnon niadtong adlaw nga Sabado (Pebrero 22, 2020).

Sa Malaybalay, nahitabo ang sunog sa Zone 4, Barangay Kalasungay alas 3 sa hapon.


Sa interview sa RMN Malaybalay ngadto kang Cpt. Lloyd Villaroya, ang city fire marshal sa BFP Malaybalay gibutyag niini nga 3 ka mga balay ang gilamoy sa kalayo nga hinimo sa light materials.

Matud niya nga sa ilang inisyal nga imbestigasyon nasayran nga adunay 11 anyos nga bata ang nagluto diin igo lang kini nigawas sa ilang balay apan nisilaob dayon ang kalayo.

Samtang sa Valencia City, nahitabo ang sunog alas 12 kapin kon kulang sa udto sa Purok 10, Poblacion niadtong Sabado.

Sa interview sa RMN Malaybalay ngadto kang SFO1 Johny Paclibar sa BFP Valencia City, gibutyag niini nga lima ka balay ang nasunog sa maong insidente.

Mukabat usab sa 525, 000 kapin kon kulang ang gibiling damyos sa mao nga sunog.

Sa karon nagpahigayon pa sila ug follow up investigation ug apil sa ilang gitan-aw ang taho nga adunay mga bata ang nagdula sa ibabaw nga portion sa panimalay kung asa nagsugod ang sunog.

Facebook Comments