General Santos City–Takda nang pasakaan ug kaso sa Police Station 1 ang tulo ka mga suspetsado nga nailang silang si Wilmar Esmael, 18 anyos nga nanimuyo sa Manansala Subd. Prk. Malakas, Barangay San Isidro, ning syudad, Jhon Dhiel Leones, 19 anyos ug Leonardo Casin, 19 anyos, parehong residenti sa Purok Pandian, Barangay Labangal ning syudad kansa una nang nasikop sa kapulisan human nilang gilunggab pinaagi sa pagbuak sa salamin ang van nga gipanag-iyahan sa PC Teo Enterprises nga gigrahe sa Atis St. Barangay Dadiangas West ning syudad niadtong Hwebes sa gabie.
Sumala pa ni PSI Abdulsalam Mamalinta ang hepe sa Police Station 1 nga samtang nagapatrol ang ilang tropa, gireport matud pa kanila sa usa ka concern citizen ang gibuhat sa mga suspect nga pagbuak sa wind shield sa maong sakyanan hinungdan nga girespondihan ug miresulta sa pagginukdanay tali sa kapulisan ug mga suspek nga sakay sa motorsiklo.
Pag-abot matud pa sa Beatillis Street, natumba ang motor nga gisakyan sa mga suspect hinungdan nga naabtan sa kapulisan, samtang nakuha usab sa posisyon sa mga suspect ang envelop nga dunay unod P10,000.00 nga gikuha matud pa sa mga suspect sa maong sakyanan.(Dave Silagan)
