Patay ang tatlo ka mga miyembro sang Bangsamoro Islamic Freedom Fighters (BIFF)-Karialan Faction sa nagluntad nga engkwentro sa tropa sang Joint Task Force Central.
Suno kay Lt. Col. Benjamin Cadiente, Commanding Officer sang 33rd Infantry Battalion (33IB) nga na engkwentro sang 33IB kag 1st Mechanized Battalion ang nasambit nga mga miyembro sang BIFF sa Barangay Linantangan, Shariff Saydona Mustafa, Maguindanao kadungan sang ginpatigayon nga clearing patrol alas 5:50 sang aga sang Hunyo 20.
Ginkilala sang lokal nga mga opisyal sang Barangay Linantangan ang mga napatay nga BIFF members nga sanday Dhen Dhen Haron (alias Kirim), Ali Amil Hasim, kag Buhari Bualan.
Wala naman sang casualties sa hanay sang militar sa sulod sang 35-minutos nga engkwentro sa grupo sang BIFF.
Narekober naman sang militar ang 2 ka caliber .45 pistols, 1 ka 9mm pistol, 2 ka hand grenades, mga bala, war materials, 1 ka sachet sang 8 grams sang ginapatihan shabu kag P1,000.00.
Ginpahayag ni Major General Juvymax Uy, Commander sang JTF Central kag 6th Infantry Division nga nagapadayon ang military operations batok sa nabilin nga miyembro sang BIFF kag Dawlah Islamiya.
Dugang pa niya nga nagapadayon ang AGILA-HAVEN Program sang probinsya sang Maguindanao para sa mga luyag magsurender nga miyembro sang ekstremista nga grupo.
