Nahilandig sa Agusan del Norte Provincial hospital ang tulo ka mga menor de edad kinsa nalambigit sa pagpangawat sa lungsod sa Buenavista ug Nasipit, Agusan del Norte, kagahapon.
Ang tulo mao sila si Bambi, 14 anyos, taga San Francisco, Agusan del Sur; Robert, 14 anyos, taga Brgy. Ambago ug John Carlo, 12 anyos nga taga Brgy. Libertad, Butuan City.
Asoy ni John Carlo una nilang gikuha ang single motor ug gimanehoan kini sa iyang kaubanan nga si Bambi og mipadulong sila sa Nasipit, Agusan del Norte; pag-abot sa maong lungsod ila na sab nga gikuha ang flashlight sa namaligya ug “kwek-kwek,” apan nasakpan sila ug gigukod. Apan nabangga ang ilang gisakyang motorsiklo sa usa ka balay, mao nga ilang gibiyaan ang motor ug misulay sila sa pag-ikyas agi sa kanal hangtud nga nahulog sila sa pangpang.
Sigun sa Nasipit MPS, nahulog ang tulo sa Brgy. 4 sa Lungsod sa Nasipit ug mibagsak / napunitan sa Brgy. 1 sa maong lungsod.
Samaron ug nakaangkon ug bali sa lawas ang mga biktima apan ang nagrabihan mao si Robert, diin migawas matud pa ang mata niini human gitoohang natusok sa kahoy nga dali sab nga girescue sa mga otoridad ug gidala sa hospital.
Aminado si John na mogamit sila ug vulcaseal. Niya pa nga nagkaila silang tulo mall sa Butuan ug pareho silang wala na mag-eskwela.
Dugang pa ni John nga wala silay plano nga ibaligya ang motor nga ilang gikuha kundili ila lamang kining “drivan-drivan.”
