Davao City – Apektado na ang agrikultura sa mga probinsya sa Davao region tungod sa nasinatiang grabeng kainit sa panahon karon o ginatawag nga El Niño.
Sa pakighinabi sa DXDC RMN Davao kang Joedel R. Leliza, Alternative Focal Person sa Disaster Risk Reduction and Management (DRRM) sa Department of Agriculture (DA)-XI, gikumpirma niini nga apektado na sa El Niño ang Davao del Sur, Davao Occidental ug pipila ka bahin sa Davao City kung itandi sa ubang mga probinsya sa rehiyon.
Gibutyag ni Leliza nga sa maong mga probinsya, ang Davao del Sur ang mas grabeng naapektuhan partikular na ang mga lugar sa Matanao, Magsaysay, Hagonoy, Kiblawan ug Bansalan diin muabot sa 2,000 hectares ang apektado.
“Nag validate na po kami sa lahat ng provinces and na-identify po na ang province of Davao del Sur, Davao Occidental and part of Davao City is affected po ng El Niño, compared to other provinces.”
Segun sa opisyal nga sagad nga maapektuhan niini ang agricultural crops sama sa mga gulay ug bisan ang mga industrial crops sama sa mais ug humay labi na kung dili na igo ang suplay sa tubig nga mahatag sa nahisgutang mga tanum.
Sa karon, aduna nay gi-propose nga action plan ang DA-XI ngadto sa kauluhan diin aduna na usay proyekto ang buhatan nga napondohan sa gobyerno sama sa buffer stocking program nga makatabang sa mga mag-uuma ilabi na sa grabeng kainit sa panahon.
Nasayran nga muabot na sa P55-M ang danyos nga hatud sa El Niño sa Davao region.
RadyoMaN Kirby Manzon
