Sa interbyu sa DXDC RMN Davao kang Police Staff Sergeant Mark Jun Asidoy, imbestigador sa Mawab Municipal Police Station, giila niini ang driver sa van nga si Abemael Samonte Jr., 48 anyos, residente sa Barangay Salvacion, Panabo City, Davao del Norte, diin kauban niini sa sakyanan ang iyahang asawa ug usa ka anak.
Gisaysay ni Asidoy nga giingon sa driver nga anaa lamang sa 60-70/kph ang iyahang dagan apan matud sa nakasaksi, posibeng muabot sa 80-100/kph ang dagan sa sakyanan, ug rason sa pagjahulog sa pangpang mao ang danlog nga dalan tungod sa pag-ulan.
“Self-inflicted accident ‘to. Slippery man gud. Dangog ang pasaka ba. Wala na niya nakontrol ang manubela. Mao ‘to nahagbong sila sa lugot,” sulti sa imbestigador.
Dali usab nga gidala sa ospital ang mga biktima nga nakaangkon lamang og mga bun-og sa kalawasan.
Pahimangno sa kapulisan sa motorista nga mag-amping sa pagbiyahe ug sundon ang mga regulasyon sa dalan aron malikayan ang susamang insidente.
RadyoMaN Kirby Manzon
