Walay pili ang matakboyan sa COVID 19 human adunay upat ka mga sundalo ubos sa 30th IB Phil. Army ang nagpositibo sa virus basi sa RT PCR result.
Sigun ni LTC Ryan Callanta, commander sa 30th IB Phil. Army nga nataptan ug virus ang upat ka mga sundalo gumikan kay kanunay sila ‘exposed’ sa gawas isip mga authorized person outside residence (APOR).
Kanunay sila tawagon aron motabang pagbantay sa mga boundary checkpoints luyu sa padayon usab nga combat operation sa kabukiran batok sa rebelding New Peoples’ Army (NPA).
Apan luyu niini, malipayong gitahu ni LTC Callanta nga naka-recover na sa virus ang 4 ka mga sundalo ug nakagawas na kini gikan sa isolation facility sa lungsod sa Bacuag, Surigao del Norte duha ka adlaw na ang nilabay.
Nagpasalamat usab ang opisyal sa LGU Bacuag nga wala magkulang sa pagtabang sa upat ka mga sundalo samtang anaa kini sa isolation facility.
[image: sundalo covid.jpg]
