3 kusog nga linog nabatian sa Davao region

173

Davao City – Naguol ug nag-panic ang mga residente sa pipila ka areas sa Davao region human nasinati ang sunod-sunod nga kusog nga linog sukad kagabii, October 16, 2019 hangtod karong adlawa.

Base sa report sa Philippine Institute of Volcanology and Seismology kun PHIVOLCS, duha ang natalang patay human mitay-ug ang magnitude 6.3 nga linog bandang alas 7:30 kagabii diin giila sa otoridad ang namatay nga mag-inahan nga sila Arjane Abundo, 22 anyos ug iyang anak nga si alyas Jan, 10 months old nga taga Magsaysay, Davao del Sur.


Ang duha natabunan sa yuta human sa nahitabong pag linog gabii.

Samtang natala usab sa nagkadaiyang Disaster Risk Reduction and Management Office kun CDRRMO sa managlahing lugar sa Davao region ang pipila ka mga residenteng samaran human naigo sa mga kabtangang nangahulog atol sa linog gani natala usab ang pipila ka mga cracks kun liki sa mga establishemento.

Tungod sa pangitabo, suspendido usab ang mga klase sa pipila ka mga lugar sa Davao region.

Karong buntag lang, magnitude 5.2 nga linog ang nabatian sa Manay, Davao Oriental bandang alas 4:53 kaganinang kadlawun samtang magnitude 5.3 nga linog ang mitay-ug sa Jose Abad Santos, Davao Occidental alas 9:29 karong buntag.

Subay niini, pahimangno sa lokal nga gobyerno ug sa mga otoridad ngadto sa katawhan nga maminaw sa abiso gikan sa mga hingtungdang ahensya ug dili magpataka og pakatag og mali nga impormasyon aron makalikay sa panic.

Kahinumduman nga daghang mga residente ang mibakwit gikan sa 16 ka barangay sa Davao City gumikan sa gipakatag nga ‘fake news’ bahin sa tsunami alert.

RadyoMaN Renz Barbarona

Facebook Comments

From Advertisers