South Cotabato- balhog na karon sa silda sa kapulisan ang 3 ka miyembro matud pa sa ‘budol-budol’ gang human nilang gibiktima ang usa ka 70-anyos nga balo nga residente sa Triniville Subdivision, Barangay Zone 4, Koronadal City.
Mga suspek nailhang silang si Manny Alvarez Diaz, 55, residente sa Cavite; Ricardo Villaro, 47 anyos , residente sa Tondo, Manila; ug Brenda Castigador, 63 anyos, residente sa M’lang, North Cotabato.
Gihimo matud pa sa mga suspek ang transaksyon sa usa ka mall sa syudad sa Koronadal diin ilang gikumbinsi ang biktima nga kuhaon ang iyang passbook ug mga alahas sa ilang panimalay bugti matud pa sa minilyon nga kwarta nga gisulod sa usa ka bag.
Apan dihang gisuta sa biktima pulos budol money lang ang unod niini mao nga midangop kini sa kapulisan.
Gilayon nga mihimo ug follow-up operation ang intel operatives diin malampusong nasikop ang mga suspek human nga na-identify ang mga nahisgutan gumikan sa CCTV Footage nga kuha sa mall ug uban pang lugar nga naadtuan sa mga nahisgutan.
Samtang gisuwayan pa ug suhol sa mga suspek ug mukabat sa P200,000.00 ang kapulisan samtang sila anaa sa Investigation Section sa Koronadal City PNP. Tungod niini, gawas sa pagpangilad sa mga suspek ngadto sa biktima, mag-atubang usab sila ug kaso gumikan sa pagsuway ug suhol ngadto sa kapulisan.
Sa karon anaa na balhog sa silda sa Koronadal City PNP ang mga suspetsadong duinakpan.
