Sikop ang 3 ka mga suspek nga miyambro sa local drug group atol sa gihimong operasyon sa Philippine Drug Enforcement Agency Regional Office-12 uban ang Kidapawan City Police Office sa may Purok 6-B, Brgy. Lanao, Kidapawan City, North Cotabato alas 9:00 sa gabie sa nakalabayng adlaw.
Mga nadakpan mao silang si Alias John Erwin, minor de edad, residenti sa Block 4, Taran Subd., Kidapawan City; Alias Maranao, minor, residenti sa Brgy. Balindog, Kidapawan City ug Jobeth Troy S Coralde, legal age, residenti sa Brgy. Poblacion, Kidapawan City, North Cotabato.
Nakumpiska gikan sa posisyon sa mga nasangpit ang (5) ka gramo sa pinaugang dahon sa marijuana, nga nagkantidad ug P600.00; P200.00 nga marked money; ug (2) sachet sa gituohang shabu.
Ang tulo miyembro sa Simbualan Drug Group nga nagaoperate sa mga munisipyo sa North Cotabato ingon man sa mga kasigbit nga lugar.
Kasong kalapasan sa Section 5 ug Section 11, Article II sa RA 9165 (Comprehensive Dangerous Drugs Act of 2002) ang ipasang-at batok sa mga suspek.
