TACLOBAN CITY – Arestado an tulo (3) nga lalaki matapos makuhaan hin granada, armas ngan droga matapos an gindumara nga checkpoint operation han McArthur PNP ha Brgy. Maya McArthur Leyte kakulop, July 30.
Ginkilala an mga suspek nga hira Lito Medionna, 27 anyos, residente han Brgy. Batug Javier, Leyte; Reynaldo Obias, 51 anyos ngan Esterio Obias mga residente han Abuyog, Leyte.
Basi ha inisyal nga imbistigasyon han mga kapulisan, usa nga concerned citizen an nagreport ha ira matapos makit-an an usa armado nga lalaki nga naglilinakat ha ira lugar.
Mahitungod hini, nagdumara dayon hin checkpoint operation an McArthur PNP ngan nakit-an nga mayada tulo nga motorsiklo an nag u-turn matapos makit an ira checkpoint.
Gin lanat han mga kapulisan an mga suspek ngan nadakop an mga ini ha maharlika highway han Brgy. Pongon McArthur, Leyte.
Nakuha kan Reynaldo Obias an usa nga hand grenade, nakuha naman kan Lito Mediola an usa caliber .38 ngan lima nga ammunition, 17 inches nga pisaw naman an nakuha kan Esterio Obias lakip an lima ka sachet nga gin-aaligar shabu.
Paslak na yana an mga suspek ha Mc Arthur PNP lock up facility.
