Dumarao, Capiz – Patay ang isa ka ginang kag duha ka mga menor de edad matapos malumos sa Badbaran River, Barangay Lawaan, Dumarao, Capiz alas 9:00 kahapon sang aga.
Ginkilala ang nagkalamatay nga sanday Ma. Luz Gonzaga 31-anyos kag duha ka mag-utod nga sanday Princess Hannah Maravilla siyam ka tuig ang edad kag John Marco Maravilla, lima ka tuig; lunsay residente sang nasambit nga lugar.
Base sa imbestigasyon sang mga kapulisan, ginhagad ni Maria Luz Gonzaga ang mga bata nga mag-upod sa pagpatubog sang karabaw sa suba upod man sa tatlo ka tuig sini nga anak. Nagpaligo pa ang mga ini sa nasambit nga suba apang gin-anod sang mabaskog nga ilig sang tubig si John Marco kag posible ginbuligan sang duha.
Magluwas nga madalom ang tubig, indi man makahibalo maglangoy si Maria Luz kag Princess Hannah rason nga nalumos man ang mga ini. Una nga nakita ang lawas nanday Maria Luz kag Princess Hannah 12:30 na sang hapon kag 1:30 naman ang kay John Marco. Ginpangdala pa sa Dumarao Medicare Hospital sanday Gonzaga kag Princess Hannah, apang gindeklara sila nga DOA.
*(photo from web)*
