Davao City- Gipahamtangan na og silot ang tulo ka mga police scalawags sa Police Regional Office XI kinsa nalambigit sa iligal nga droga.
Gibutyag ni PRO-XI spokesperson PCI Andrea Dela Cerna nga gilihok na sa Regional Internal Affairs Service Davao Region ang mga kasong paglapas sa RA 9165 batok sa tulo ka mga pulis.
Giila ang mga police nga sila PO1 Kenneth Gervir Casane nga nadestino sa Davao Oriental Police Provincial Office (DOPPO), PO2 Otto Lumogdang ug PO1 Romel Parreño nga pulos nadestino sa Davao del Norte Provincial Police Office (DNPPO).
“Na-file na iyong kaso at iyong iba talaga naman pong napakulong at iyong iba naman po is still subject for investigation because of their alleged involvement. Sabi po ng ating regional director na hindi natin kinakailangan ang ganitong mga klaseng tao sa serbisyo,” sumala ni Dela Cerna.
Subling gisulti ni Dela Cerna nga dili nila ikonsente ang mga pulis sa mga hiwing binuhatan ug dili usab sila magpanuko nga taktakon kini sila sa serbisyo.
Matud ni Dela Cerna nga 1% lamang ang mga police scalawags ug mas daghan gihapong mga pulis sa Davao Region nga matinud-anon sa ilang mga mga serbisyo.
Dugang niini nga hugot ang pagbantay sa Counter Intelligence Monitoring Task Group Group sa tanang mga lihok sa kapulisan dinhi sa Davao Region kini aron maseguro nga malimpyuhan gayod ang ilang han-ay.
“Hindi na rin po kailangan mag-worry ng ating mga kababayan because we are policing our ranks. We have this monitoring group who are now working to check all the activities of our police officers,” segun ni Dela Cerna.
RadyoMan Aimee Guinita
