General Santos City—1 patay samtang 3 ang nadakpan sa gihimong Anti-Illegal Drug Operation sa Philippine Drug Enforcement Agency (PDEA) Regional Office -12 ilawom sa supervision ug control ni Director Valente Cariño sa pakig-alayon sa Cotabato Police Provincial Office (CPPO), Cotabato Police Mobile Force Company (CPMFC), Provincial Intelligence Branch(PIB), Kabacan Municipal Police Station, Tulunan Municipal Police Station, Kidapawan City Police Station, Carmen Municipal Police Station ug 7th Infantry Battalion, Philippine Army sa Kabacan, Cotabato Province.
Giila ang mga nasikop nga silang si Akmad Blah y Sandigan Alias Akmad, 22; Abdul Angkanan Alias Bapa Abdul, 44, driver, pulos residenti sa Tandang Sora Extension, Brgy. Poblacion, Kabacan, Cotabato; ug Ali Beldik Y Zacaria, 28, residenti sa Sitio Lote, Brgy. Kayaga, Kabacan, North Cotabato.
Nakumpiska atol sa search operation ang mukabat sa (15) ka pakete sa gituohang shabu nga may gibug-aton nga 5.5 gramos nga nagkantidad ug P27,500.00.
Samtang patay usab sa operasyon sa may Purok 1, Brgy. Poblacion, Kabacan, North Cotabato si Beldik Usop human nga misukol pinaagi sa pagbunlot sa iyang pusil atol sa operasyon, nakasibat usab ang kaubanan niining si Benzar Usop human nga namatikdan ang presensya sa kapulisan.
Narekober sa pinuy-anan sa mga nasangpit ang mukabat (15) ka sachets sa gikatahapang shabu nga anaa sa 4 gramos ug nagkantidad ug P20,000.00 ingon man nagkandaiyang drug paraphernalia.
Subay sa reports nga nakalap sa PDEA ug sa kapulisan, ang mga suspek lambigit sa organized crime group, kung asa ang ilang operasyon nakasentro sa illegal drug trafficking samtang lambigit usab sila sa carnapping, robbery ug theft sa probinsya sa Cotabato.
Kasong kalapasan sa Section 11 (Possession of Dangerous Drugs), Article II sa R.A 9165 (Comprehensive Dangerous Drugs Act of 2002) ang atubangon sa 3 ka dinakpan lakip na sa usa ka suspetsadong nakasibat.
