General Santos City—Sikop ang tulo ka mga personahe nga pulos dunay warrant of Arrest atol sa sunod-sunod nga operasyon sa operatiba sa Police Station 4, kagahapong adlawa.
Unang nasikop alas 8:00 sa gabie ang suspek nga si Jerry Zamora, 48 anyos, residenti sa Purok Udagre, Barangay Conel, Gensan.
Nasikop ang nahisgutan gumikan sa warrant of arrest niini sa kasong grave coercion pinitsahan ug April 28, 2015.
Sunod nga nasikop alas 8:20 ang takna sa gabie ang mga suspek nga silang si Alfredo Villa, 23 anyos, mekaniko; ug Rommel Reyes, 45, mekaniko, pulos residenti sa Jargon Construction Compound, Dacera Avenue, Barangay San Isidro Gensan.
Ang mga nasangpit nag atubang ug kasong Qualified Theft. Buluntaryo sab nga miuban sa Warrant Officers sa Police Station 4 ang mga nasangpit human nga gipresentar kanila ang warrant of arrest sa kasong ilang giatubang.
Sa karon nga mga dinakpan balhog na sa silda sa kapulisan ug commitment order nalang ang gipaabot aron sila mabalhin sa Gensan City Reformatory Center, samtang mamahimo nilang maangkon ang temporaryong kagawasan kung sila makapyansa sa ilang kasong giatubang.
