30 ka barong-barong sa provincial capitol grounds, giguba

29
PC: RadyoMaN Nitz Arancon

Giguba sa Misamis Oriental Provincial Government ang kapin sa 30 ka barong-barong sa public Plaza sa  kapitolyo Provincial nga maoy gihimong kampo sa mga bakwit gikan sa Sitio Mincamansi, Barangay Banglay Lagonglong Misamis Oriental nga mikabat sa kapin 140 ka mga indibidwal lakip tigulang ug mga bata.

 

Matud ni Rey Dante nga Chairman sa Barangay 27 ning syudad nga ang maong mga bakwit nakalapas sa City Ordinance 9528-2005.


 

Kini tungod sa ilang pagtukod sa mga estruktura sa Public Plaza sa kapitolyo nga walay permit sa gobyerno.

 

Ang sulat ni Kapitan Dante, iyang gipadala ni Jocelyn Hilogon ug sa iyang pamilya kinsa maoy nagsilbing leader sa maong mga bakwit.

 

Sa iyang sulat nga pinitsahan June 17, gipasabot ni Kapitan Dante kang Mrs. Hilogon nga ang ilang pagtukod sa mga structures sa Public Plaza sa kapitolyo, usa ka “Nuisance” ug “illegal” basi sa City Ordinance.

 

Si Misamis Oriental Provincial Legal Officer Cerilio Niel Pacana, napikon sa mga bakwit kay wala  motuman sa ilang sabot.

 

Matud  ni Pacana nga walay problema alang sa administrasyon ni Governor Bambi Emano kon ang mga bakwit magkampo sa Kapitolyo, basta dili lang magtukod sa  structure sama sa mga kawayan, Plywood, coco lumber ug  trapal.

 

Gibutyag ni Pacana nga gilingla siya sa mga bakwit kay ang ilang sabot, ila lang ayuhon ang ilang nagabok nang mga tulda ug dili maggamit sa mga kawayan, coco lumber, Plywood ug dili magtukod sa barong barong.

 

“Tungod sa inyong  malinglahon nga lihok, napugos kami aron paghatag kaninyo sa duha ka oras para i-dismantle ang inyong mga gipangtukod nga istruktura diha sa Parke” matud ni Atty. Pacana.

 

Apan ang mga bakwit, nagmagahi ug wala nila i-demolish ang ilang mga barong-barong.

 

Kini ang rason nga mga alas otos sa buntag niadtong Martes, gidemolish sa mga sakop sa City Engineers Office ang ilang mga structures.

 

Matud ni Father Roland Abejo nga Pari sa Iglesia Filipina Independiente kon IFI ug Chairman sa Movement Against Tyranny kon MAT nga walay kasing-kasing ang liderato ni Governor Emano sa ilang pag-demolish sa mga barong-barong sa mga bakwit.

 

“Kanang ilang gi-ingon nga kon taga Mis. Or ka, secure ka. Asa may secure diha nga wala na may katulgan kining mga lumad kay ilang mang gi-demolish” matud ni Abejo.

 

Matud ni Jonerey Hilogon nga spokesman sa mga bakwit nga hangtud nga dili mahatag sa kapitolyo ug sa gobyerno ang ilang gipangayo, dili sila mobalik sa ilang lugar sa Sitio Mincamansi.

 

Unang gipangayo sa mga bakwit nga I pull-out ang mga sundalo sa ilang lugar, ayha sila mobalik sa ilang mga balay sa Sitio Mincamansi, Barangay Banglay, Lagonglong, Misamis Oriental.

Facebook Comments

From Advertisers