Davao City – Tungod sa kahadlok, namakwit na matud pa ang pipila ka mga pamilya gikan sa Sitio Indawhong, Salaysay Marilog District ning syudad tungod sa sunod-sunod nga engkwentro tali kasundaluhan ug New People’s Army kun NPA sa lugar nga nagsugod alas 2 sa hapon kagahapon.
Sa pakighinabi sa DXDC RMN Davao sa Brgy. Captain sa Salaysay nga si Kapitan Robert Itdang, gibana-banaang anaa sa kapin 30 ka mga pamilya ang nakababa na gikan sa nasangpit nga sitio apan dismayado matud siya sa City Social Services and Development Office kun CSSDO human wala pay klarong tubag ang opisina alang sa kinahanglanon nga hinabang.
Dugang sa kapitan nga anaa sa boundary sa Tambobong ug Salaysay nag-abot ang 3rd Infantry Battalion ug Guerilla Front 54 ilawum sa NPA.
Samtang sa pakighinabi sa DXDC RMN Davao kang Captain Eric Calulot, CMO officer sa 3rd Infantry Battalion Philippine Army nga usa ka Cafgu Active Auxiliary (CAA) ang napatay samtang samdan ang duha ka mga sundalo sa maong engkwentro, padayon usab ang ilang ginalusad nga hot pursuit operation ug sutaon usab ang mga giingong namakwit tungod sa miulbong engkwentro.
RadyoMaN Renz Barbarona
