TACLOBAN CITY – Duha nga Gobernador ngan upat nga myembro han kongreso in apil ha mga kandidato Ha Sinirangan Bisayas nga nangangaro hin body guards tungod nga may nakakarawat hira nga hulga ha ira kinabuhi.
Basi ha records tikang ha Regional Joint Security Control Center (RJSCC), 30 nga kandidato para ha may 13 elections an naghahangyo nga tagan hira hin seguridad.
An RJSCC in nakomposar hin regional offices tikang ha Commission On Elections (Comelec) nga nalingkod kumo Chair, samtang an Police Regional Office 8 (PRO-8) ngan Philippine Army ha rehiyon in nalingkod nga mga myembro.
Sumala kan PRO8 Director Chief Supt. Dionardo Carlos, an mga aplikasyon han mga kandidato in gintagan hin katugutan han RJSCC.
Pero igveverify anay ini han Comelec Central Office antis tagan hira hin police escorts.
Siring ni Carlos, tatagan hin duha nga uniformed security personnel an kada usa nga kandidato.
Kun an mga kandidato in mayada sobra duha nga police bodyguards, igpapatawag an kandidato ngan tatagan hin oras nga mag-explain o tatanggalan hira hin seguridad.
Pero pagklaro ni Carlos, pwede tagan hin sobra duha nga police bodyguards an usa nga kandidato kun maatender hin mga public gatherings.
Pero igdedeploy la an mga bodyguards ha mismo nga event.
An mga nangaro hin police bodyguards in hira Governors Leopoldo Dominico Petilla han Leyte ngan Sharee Ann Tan han Samar.
Hi Petilla in nadalagan utro pagka-gobernador samtang hi tan in nadalagan pagka-Congresswoman ha second district han Samar.
Nangangaro gihapon hin police bodyguards hira Rep. Milagros Tan han 2nd district han Samar; Rep. Edgar Mary Sarmiento han 1st district han Samar; Rep. Lucy Torres Gomez han 4th district han Leyte; ngan Jose Carlos Cari han 5th district han Leyte.
Pati hi Ormoc City Mayor Richard Gomez in nangangaro gihapon hin police bodyguards.
Pati na hira Mayors Maria Fe Abunda han Borongan City; Christopher Sheen Gonzales han bungto han Guiuan; ngan Vice Mayor Conrado Nicart III han San Policarpo.
Pati hi Karen Lolita Javier, nga nadalagan pagka-congresswoman han 2nd district han Leyte in nangangaro gihapon hin police escort.
An iba naman nga nangangaro hin police escort hira Calbayog City Mayor Ronaldo Aquino nga nadalagan hin reelection, usa nga kandidato pagka Vice Governor, 10 nga Mayor, upat nga kandidato pagka Vice Mayor ngan usa nga kandidato pagka board member.
