30 pamilyang apektado sa DVD raid midangoyngoy

Davao City – Naghilak nga midangop ang pipila ka mga apektadong tigbaligya og pirated DVDs ngadto sa kapitan sa Brgy. 23-C Davao City human sa gihimong Simultaneous Joint Operation sa Optical Media Board ug Davao City Police Office sa nagkadaiyang areas sa dinhi sa syudad.

Sa pakighinabi sa DXDC RMN Davao kang Brgy 23-C captain Wating Usman, nagtulo matud pa ang luha sa iyang mga ginsakpan kinsa apektado sa maong raid diin sinako ka mga pirated DVDs ang nakumpiska sa mga otoridad sa gihimong raid kagahapon, September 6, 2018.

Hinungdan nga miapela karon ang kapitan ngadto kang Davao City Mayor Inday Sara Duterte nga tugtan nalang sa pagpamilgya og mga DVDs ang mga vendors tungod mao lang kini ang ilang panginabuhian diin muabot sa 30 ka mga pamilya ang apektado niini nga sakop sa iyang brgy.


“Sa dugay na nga panahon, kaniadto si Presidente nga siya pa ang Mayor sa Davao, gitugtan man pud ta sa pagpaninda diri apan isa lang akong hangyo nga kung pwede tugtan ta diri sa Davao,” hangyo sa kapitan.

Sa karon, hulaton lang matud pa sa kapitan ang Mayor nga kasamtangang anaa pa sa Jordan uban si Presidente Rodrigo Duterte aron mapaabot niini ang ilang mulo bahin usab sa maong panghitabo.

RadyoMaN Renz Barbarona

Facebook Comments