Davao City – Ipailawom sa community swabbing ang Calinan Public Market, Davao City karong Sabado (Abril 10, 2021) diin 300 ka indibidwal ang target sa maong surveillance.
Sa interbyu sa DXDC RMN Davao kang Dr. Jojit Marbas, Calinan District Health Center Head, gibutyag niini nga target sa maong testing ang mga indibidwal nga anaa sulod sa palengke sama sa mga owners, vendors ug uban pang personahe.
Matud ni Marbas, wala kini nagpasabot nga adunay nagpositibo o close contact sa COVID-19 positive kun dili aron mapalapdan ang COVID-19 testing labi na nga daghang indibidwal gikan sa lain-laing lugar ang naga-adto sa maong palengke.
“When we say public market dinha man gyud naga anha ang mga tao (para) mamalengke, palit lamas, palit isda, gulay. So, kung baga diri sa Calinan, siya ang melting pot sa Marilog, Tugbok, Arakan.. diri naga anhi sa Calinan. So tan-awon nato ang whole picture. Sa bagay, ang COVID naa rabay mga asymptomatic,” saysay ni Marbas.
Gibutyag ni Marbas, kapin bulan na nga wala nagbaton og kaso sa COVID-19 ang Calinan Poblacion hinungdang mas maayong makompirma kini pinaagi sa maong aktibidad.
Dugang sa health official, ugaling aduna may magpositibo, i-agi kini sa proseso sama sa pag-isolate sa pasyente ug pagpahigayon og contact tracing gikan sa F1, F2 ug F3 close contact sa COVID-19 positive patient.
RadyoMaN Kirby Manzon
