Roxas City, Capiz – Ginpahayag ni Remelyn Recoter nga regional executive director sang Department of Agriculture sa Western Visayas nga magabaton sang P5,000.00 ang tagsa tagsa sa 31,347 ka magamay nga mga mangungoma sa probinsya kaangot sa Financial Subsidy to Rice Farmers (FSRF) nga programa sang amo nga ahensya bilang bulig sa mga apektado sang COVID-19 nga krisis. Ang maayong balita sa mga mangungoma ang ginpaabot ni Recoter bilang dinapit nga bisita sa Abril 27 nga presentasyon sang “The Governor’s Update” nga programa sang lokal nga panguluhan sang probinsya. Gindugang pa ni Recoter nga ang mga kwalipikado sa P5,000.00 nga makabig “social amelioration” sang DA amo ang mga mangunguma nga may isa ka ektarya ukon manubo pa nga ulumhan base sa Registry System for Basic Sectors in Agriculture (RSBSA) nga isa ka database sang mga impormasyon nahanungod sa mga mangungoma, trabahador sa ulumhan kag iban pa nga mga nagatrabaho sa sektor sang agrikultura. Samtang gindugang pa niya nga may Expanded Survival and Recovery Assistance (SURE) Aid ukon pautang nga P25,000.00 nga ginatanyag ang DA sa mga apektado nga mga mangungoma sang pandemya nga ila pagabayaran sa sulod sang 10 ka tuig nga wala sang interes. Subong man, may inisyatibo man nga “KADIWA Ni Ani At Kita” ang ahensya agud nga mag-angot sa mga mangungoma kag ila mga produkto sa mga bumalakal sa tion sang COVID-19 nga krisis. Ang KADIWA sa probinsya nga ginapatigayon sang Office of the Provincial Agriculturist ang tagsa ka Martes kag Huwebes sa may Provincial Park diri sa syudad sang Roxas.
via- (JBG/AAL/PIA Capiz)
