General Santos City—kulatado ang usa ka 32 anyos nga construction worker human kining gitabangan ug kulata sa mga miyembro sa Children in Conflict with the Law (CICL) o mas naila sa tawag nga mga “BATANG SUKARAP” alas 3:30 ang takna kaganinang kabuntagon sa may Fil-am road, Barangay Fatima, Gensan.
Biktima giilang si Jeyson Coving, 32, residenti sa Purok Dataldan, Barangay San Jose, Gensan.
Subay sa report sa Police Station 7 nasuta nga nag inum ang biktima uban sa iyang mga kaubanan sa trabaho sa ilang bunkhouse sa maong lugar, paggawas niini naatlan nga miagi ang grupo sa mga Batang Sukarap.
Siya gitabangan ug kulata sa mga nahisgutan nga miresulta sa pagkaangol niini. Nasayran nga daghan nga samad sa ulo ang naangkon sa biktima kansa gidala sa iyang mga kaubanan sa Dr. Jorge Royeca Hospital.
Paspas usab nga nanibat ang mga suspek human sa pagpangulata. Sa karon ang kapulisan naghimo nag makuting imbistigasyon kalabutan sa insidenti.
