General Santos City—gipusil sa wala pa mailhing suspetsado ang usa ka 34 anyos nga lalaki samtang naglingkod tapad ra sa iyang inahan sulod sa ilang compound sa Barangay Apopong Gensan.
Giila ang biktima nga si Jose Dulay Jr. nga taga Purok. 9,Lanton, Barangay Apopong Gensan.
Alas 6: 45 ang takna sa gabie, Sabado, August 5, 2017 dihang gipusil ang nahisgutan samtang nag dulag cellphone sulod sa ilang compound.
Duha ka mga suspek ang kalit miabot dayon gipusil ang nahisgutang biktima pila ka higayon nga hinungdan sa iyang kamatayon. Paspas usab nga misibat ang mga suspek human sa pagpamusil, samtang ang biktima wala na madala pa sa ospital human nakabsan gilayon ug kinabuhi.
Sumala sa inahan niini nga si Josefina Dulay igo rang nag lingkod ang iyang anak sa iyang tapad samtang nag dula ug games sa iyang cellphone dihang gipusil kini sa duha ka mga suspek dayon sibat.
Ang ginang miangkon nga iyang gidudahan sa pagpatay sa iyang anak ang kalabutan sa uyab niini nga usa usab ka minyo. Nasayran nga anaa sa obroad ang asawa niini nag trabaho samtang ang duha niini ka mga anak ang tua sa syudad sa Davao.
Pila ka adlaw sukad gipusil ang nasangpit nga biktima, iyang giuban sa ilang balay ang iyang uyab dayon sila nag uban sulod sa lima ka adlaw, gani iya pa kining gihatod dihang miuli ang maong babaye.
Samtang ang kapulisan sa Police Station 2 pinaagi ni Police Sr. Inspector Robert Fores, Deputy Chief Of Police nagbutyag nga usa sa ilang gitutukan nga motibo ang bahin sa love triangle u gang kalabutan sa iligal nga druga human nakit-an sa payag nga gipuy-an sa biktima ug sa iyang uyab ang mga aluminum foil nga gituohang gigamit sa mga nahisgutan sa pot session.
Samtang ila usab sutaon ang report nga lider ang nasangpit sa grupo sa mga Children in Conflict with the law (CICL) o mas nailhan sa tawag nga “SUKARAP”.
Sa kasamtangan padayon pa ang gihimong imbistigasyon kalabutan sa insidenti.
